Kya jaane kis khumaar mein kis josh mein gira Lyrics

کیا جانے کس خمار میں کس جوش میں گرا

وہ پھل شجر سے جو مری آغوش میں گرا

کچھ دائرے سے بن گئے سطح خیال پر

جب کوئی پھول ساغر مے نوش میں گرا

باقی رہی نہ پھر وہ سنہری لکیر بھی

تارا جو ٹوٹ کر شب خاموش میں گرا

اڑتا رہا تو چاند سے یارا نہ تھا مرا

گھائل ہوا تو وادیٔی گل پوش میں گرا

بے آبرو نہ تھی کوئی لغزش مری قتیلؔ

میں جب گرا جہاں بھی گرا ہوش میں گرا

قتیل شفائی